હરાવ જિંદગી- બૈજુ જાની

હોય એટલું જોર હવે લગાવ જિંદગી,
દમ હોય તો મને હવે સતાવ જિંદગી

સુખની વ્યાખ્યા મેં જડમૂળથી બદલી,
દમ હોય તો દુઃખ હવે બતાવ જિંદગી.

ગોતી લઉં છું આનંદ દરેક વાતમાંથી,
દમ હોય તો મને હવે રડાવ જિંદગી.

દૂરથી લડી ન માપ્યા કર જોર મારું,
દમ હોય તો બથોબથ હવે આવ જિંદગી.

પડી પાછો બેઠો થાઉં છું બમણા જોશથી,
દમ હોય તો મને હવે હરાવ જિંદગી.

હું નહીં, પણ તું જરૂર થાકશે લડાઈમાં,
દમ હોય તો હાથ હવે મિલાવ જિંદગી.